 Hendrik Cronjé
Bloemfontein - Vir die Vodacom Vrystaat Cheetahs draai alles môre om sy losvoorspelers wanneer hy die Blou Bulle in ’n Absa Curriebeker-rugbywedstryd op Vodacompark pak.
Die Vodacom Vrystaat Cheetahs moet sonder Heinrich Brüssow, Juan Smith en Frans Viljoen klaarkom, maar met ’n tweedekeuse -lostrio wat twee Bokke, ’n Blitsbok en ’n derde Bok op die plaasvervangersbank insluit, maak dit eenvoudig sin dat die tuisspan vandeesweek baie klem op die losstryd lê.
Boonop sal dit as groot aanmoediging vir die Vodacom Vrystaat Cheetahs dien dat Kabamba Floors in sy 100ste Absa Curriebeker-wedstryd speel en Hendro Scholtz na ’n afskeidsgeskenk op soek kan wees.
Die 29-jarige Floors sal die Vodacom Vrystaat Cheetahs in sy 73ste wedstryd verteenwoordig nadat hy voorheen 27 keer vir die Suidwestelike Distrikte uitgedraf het.
Die 31-jarige Scholtz se loopbaan begin nou vinnig einde se kant toe staan en Sport24 het betroubaar verneem dat dié jarelange staatmaker op die randjie is om ’n kontrak met ’n oorsese klubspan te sluit.
Die moontlikheid is nie uitgesluit nie dat dit vandag sy 96ste en laaste Absa Curriebeker-wedstryd in die Vrystaat-trui kan wees.
Scholtz is nog tot einde Oktober deur die Vodacom Vrystaat Cheetahs gekontrakteer en moet goedkeuring van die Cheetahs-direksie kry voordat hy vrygestel kan word.
Gelukkig is Scholtz en Floors ervare genoeg om te besef dat hul persoonlike doelwitte opsy geskuif moet word as hulle met die hulp van Ashley Johnson en die Blitsbok Philip van der Walt die afwesigheid van Ligblou-sterre soos Pierre Spies, Dewaldt Potgieter, Danie Rossouw en Deon Stegmann behoorlik wil uitbuit.
Die afrigter van die Cheetahs, Naka Drotské, het juis gister erken hy is verlig dat Stegmann, ’n giftige en hoogs onderskatte baljagter, nie môre speel nie.
“Ek is bly dat Deon nie speel nie, aangesien hy ons baie probleme in ons wedstryd op Loftus gegee het voordat hy beseer is,” sê Drotské.
Die spel van sy losvoorspelers in die seges oor die Westelike Provinsie en Griekwas gee Drotské genoeg moed vir die losstryd teen die Bulle se grootliks onbeproefde kombinasie van Derick Kuün, CJ Stander en Gerrit-Jan van Velze. “Ons lostrio kombineer goed. Hendro en Philip speel vorentoe en Ashley val uitstekend terug. Philip het sy kans mooi aangegryp (in Smith se afwesigheid) en verdedig as ’n erkende baldraer weekliks beter,” sê Drotské.
Die Vodacom Vrystaat Cheetah-breier sê hy is ewe beïndruk met Johnson se goeie samespel met sy agterlyn.
Floors was al dikwels ’n doring in die vlees van die Blou Bulle en dit sal heel gepas wees as hy môre in sy 100ste wedstryd weer ’n impak kan maak wat die Vrystaters tot ’n tweede sege dié seisoen oor die Ligbloues kan aanspoor.
|
